खोटाङको पार्क बर्षादको समयमै भासियो: गुणस्तरहीन भएको स्थानीयको भनाई

धरान । खोटाङमा चार करोड भन्दा बढीको लागतमा निर्माण भएको शपिङ कम्प्लेक्स र चिल्ड्रेन पार्क सामान्य वर्षामै भासिएको छ । भासिनुमा स्थानीयहरुले गुणस्तरहीन सामाग्री प्रयोग गरेको आशंका गरेका छन्

जिल्लाको दिक्तेल रुपाकोट मझुवागढी नगरपालिका १– दिक्तेल बजारको रत्नपार्कमा निर्माण गरिएको शपिङ कम्प्लेक्स र चिल्ड्रेन पार्क सामान्य वर्षामै पर्खाल र मैदान भासिएको हो । संस्कृति, पर्यटन तथा नागरिक उड्डयन मन्त्रालयले नगरपालिकासँगको साझेदारीमा चार करोड ३७ लाख ८४ हजार ७ सय ५१ रुपैयाँको लागतमा शपिङ कम्प्लेक्स र चिल्ड्रेन पार्कको मैदान निर्माण गरेको थियो ।

गत फागुन ३ गते दिक्तेल रुपाकोट मझुवागढी नगरपालिकाका तत्कालीन मेयर दीपनारायण रिजाल र उपमेयर विणादेवी राईले कम्प्लेक्स र चिल्ड्रेन पार्क उदघाटन गरेका थिए । निर्माण कम्पनी उमालामा अनशुबी जेभीले ठेक्का लिएको शपिङ कम्प्लेक्स र चिल्ड्रेन पार्क २०७८ जेठ ६ गते शिलान्यास गरिएको थियो ।

व्यावसायिक प्रयोजनका लागि निर्माण गरिएको शपिङ कम्प्लेक्सको माथिल्लो तलाको पछाडिपट्टि चिल्ड्रेन पार्क निर्माण गरिएको छ । माटो भरेर पर्खाल उठाइएका कारण चिल्ड्रेन पार्कको मैदान भासिएको देखिएको मेयर तीर्थराज भट्टराईले बताए । उनले भने–‘भासिएको हैन बर्षाद्ले माटो बगाएका कारण भाँसिएको देखिएको हो ।’

चिल्ड्रेन पार्कको एकतिरको भाग शपिङ कम्प्लेक्सको पेटीसम्मै भासिएको छ भने चिल्ड्रेन पार्कको मैदानको स्वीमिङ पुल पनि भासिए कारण पर्खाल समेत चर्किएको छ ।