भागलपुरको साकेला थान पर्यटकीय गन्तव्य बन्दै

उदयपुर । पर्यटकीय गन्तव्यको रुपमा विकाश भइरहेको उदयपुरको भागलपुरमा रहेको साकेला थान पनि धार्मिक पर्यटनको केन्द्र बन्न थालेको छ ।

विगत ४ वर्ष अघि स्थापना गरिएको बेलका नगरपालिका वडा नम्बर २ मा रहेको साकेला थानमा आन्तरिक पर्यटकहरु आउने गरेका छन् । विशेष गरि किरातीहरुको धार्मिक स्थलको रुपमा रहेको साकेला थानमा वर्षेनी उभौली र उधौलीमा मेला लाग्ने गरेको छ । किरातीहरुको आस्थाको केन्द्र बन्दै गएको साकेला थानमा अन्य क्षेत्रबाट पनि धर्मावलम्बीहरु आउने गरेका छन् ।

बेलका नगरपालिका कृषि क्षेत्रको एउटा महत्वपुर्ण हवको रुपमा मानिन्छ । कृषि क्षेत्र संगै धार्मिक पर्यटन, प्राकृतिक सौन्दर्यताले पनि महत्वपुर्ण बन्दै गएको बेलकामा साकेला थानले थप टेवा पुर्याउने विश्वास लिइएको छ । बेलकामा भुतिया दह, सुगाचरी भिर, कालुङ झरना, मैना राजा रानी मन्दिर, बेलका तरि लगाएतका स्थानहरु पर्यटकहरुका लागि परिचित स्थान हुन् ।

साकेला थान पुरानो भए पनि ४ वर्ष अघि समिती गठन गरि संरक्षण गर्दै आएको भागलपुर साकेला थान समितीका अध्यक्ष रतन राईले बताए । साकेला थानको निर्माणका लागि वडा कार्यालय मार्फत नगरपालिकाले १ लाख रुपैया सहयोग गरेको थियो । नगरपालिकाको सहयोग र जनसहभागितामा साकेला थान निर्माण गरिएको सचिव दिलराज राई बताए ।
थानलाई संरक्षण गर्न घेरा बारा फाउण्डेसन निर्माण एवम इटाको वाल निर्माण कार्य सम्पन्न भइसकेको छ । साकेला थानको थप प्रचार प्रसार गर्न सके धार्मिक पर्यटकहरुको लागि गन्तव्य स्थल बन्ने स्थानीय देवराज राईको भनाई छ ।