वडा कार्यालयबाट सेवा सुविधा उपभोग गर्न कठिनाई भएको भन्दै सिमा हेरफेरको माग

धनकुटा / धनकुटाको पाख्रीवास नगरपालिका–३ कसेनी टोलमा बसोबास गर्दै आएका स्थानीय टोलबासीहरुले वडा कार्यालयबाट सेवा सुविधा उपभोग गर्न कठिनाई भएको भन्दै सिमा हेरफेरको माग गरेका छन् ।

साबिक पाख्रीवास नगरपालिका–४ का स्थानीयवासीहरुले हाल वडा नं. ३ बाट सेवा सुविधा उपभोग गर्न समस्या भएको भन्दै उल्लेख गर्दै सिमा हेरफेर गर्न माग गर्दै नगरपालिकामा ज्ञापन–पत्र बुझाएका हुन् । पाख्रीवास नगरपालिका–३ कसेनी टोलमा बसोबास गर्दै आएका करिब ६० घर टोलवासीले हाल पाख्रीवास कृषि अनुसन्धान केन्द्र नजिकै रहेको ४ नम्बर वडा कार्यालयबाट प्रवाह हुने सेवा सुविधा लिन अत्यान्तै कठिनाई भएको भन्दै नगर प्रमुख वृषबहादुर राईलाई ज्ञापन–पत्र बुझाएका छन् । नगरपालिकाको नयाँ संरचना अनुसार हालको ३ नम्बर वडाको भौगोलिक सिमा उत्तरतर्फ धनकुटा नगरपालिका–१ हिले र दक्षिणतर्फ कसेनी भुल्केसम्म जोडिएको छ ।

साबिकको वडा नं. ४ र हालको वडा नं. ३ कसेनीमा बसोबास गर्ने नगारिकहरुलाई राज्यले प्रदान गर्ने सेवा सुविधा उपभोग गर्न असहज भएको उनीहरुले वताएका छन् । उनीहरुले आफुहरु बाध्य भएर टोलवासीको संयुक्त निर्णयले हस्ताक्षर संकलन गरी पुनः हालको पाख्रीवास नगनरपालिकाको ४ नम्वर वडामा समेटी दिन निवेदन दिएको कसेनी टोलवासीका अगुवा चकेन्द्र कुमार राईले बताए । उनले संघीय संरचना अनुसार तत्कालिन गाविस भन्दा पनि अपायक परेकाले कसेनी टोलका जनताहरुलाई सिंहदरबारको अधिकार घर–घरमा भनिरहँदा सेवा लिन कठिन भएको नगर प्रमुख वृषबहादुर राई सामु गुनासो गरेका छन् ।

नगरपालिकामा ज्ञापन–पत्र बुझाउन पुगेका कसेनी टोलका अर्का अगुवा मिलन देवान राईले स्थानीय सरकार संचालन ऐन, २०७४ को परिच्छेद–२ को दफा ६ मा व्यवस्था भएको सिमा हेरफेर सम्बन्धी कानुनी आधारलाई टेकेर आफुहरुले माग गरेको बताए । उनले कसेनी टोलका ६० घरका करिब ३ सय भन्दा सदस्यहरुको संयुक्त भेला र मञ्जुरीबाट निर्णय गरेर वडाको सिमाना हेरफेरको विषयमा नगरपालिकामा ज्ञापन–पत्र दिन टोलवासीको अगुवाई गरेर आफुहरु आएको बताए । कसेनी टोलवासीले बुझाएको सिमा हेरफेर सम्बन्धी ज्ञापन–पत्र बुझ्दै नगर प्रमुख राईले टोलवासी मागलाई सम्बोधन गर्न आवश्यक प्रक्रिया अघि बढाउने प्रतिबद्धता व्यक्त गरे ।

टोलवासीको पूर्ण सहमति भए टोलवासीहरुको आमभेला बोलाएर आमभेलाको निर्णय सहित सिमा हेरफेरको लागि नगरपालिका अघि बढ्ने प्रमुख राईले बताए । टोलवासीले नै आफुहरु राजीखुशी साथ पाख्रीवास वडा नं. ३ बाट वडा नं. ४ मा समाहित हुन तयार हुने भए नगरकार्यपालिकाले प्रक्रिया अघि बढाउन ढिला नगर्ने उनले भने । उनीहरुले पाख्रीवास नगरपालिका कार्यालयमा बुझाएको ज्ञापन–पत्र जिल्ला प्रशासन कार्यालय धनकुटामा समेत बोधार्थ दिएका छन् ।