पुष्पलाल श्रेष्ठको ४२ औं स्मृति दिवसको अवसर पारेर वृक्षरोपण

धनकुटा / नेपाल कम्युनिष्ट पार्टी (नेकपा) धनकुटाले नेपाल कम्युनिष्ट पार्टीका संस्थापक महासचिव पुष्पलाल श्रेष्ठको ४२ औं स्मृति दिवसको अवसर पारेर ७ हजार भन्दा बढी वृक्षरोपण गरेको छ ।

कम्युनिष्ट पार्टीका संस्थापक महासचिव श्रेष्ठको ४२ औं स्मृति दिवसको स्मरण गर्दै जिल्लाका सातै पालिकाहरुमा पार्टीको निर्देशन अनुसार ७ हजार ५ सय विभिन्न प्रजातिका बिरुवाहरु वृक्षरोपण गरिएको छ । समाजवाद र कमरेड पुष्पलाल विषयक अन्तरक्रिया कार्यक्रम सहित जिल्लाको सातै तहमा आयोजना गरिएको वृक्षरोपण कार्यक्रम अन्तरगत चौबिसे गाउँपालिकामा ८ सय, साँगुरीगढी गाउँपालिकामा ५ सय, सहिदभूमि गाउँपालिकामा एक हजार ५ सय र छथर जोरपाटी गाउँपालिकामा एक हजार विरुवा रोपिएको छ । त्यस्तै महालक्ष्मी नगरपालिकामा ७ सय, पाख्रीवास नगरपालिकामा एक हजार र धनकुटा नगरपालिकामा दुई हजार विरुवा रोपिएको नेकपा धनकुटाका प्रचार तथा प्रकाशन विभाग प्रमुख अर्जुन राईले बताए ।

जिल्लाका सातै तहमा पार्टीको नगर तथा गाउँ कमिटीहरुको व्यवस्थापनमा र जिल्लाका ६० वटै वडाहरुमा वडा कमिटीहरुको व्यवस्थापनमा विभिन्न प्रजातिका विरुवाहरु रोपण गरिएको थियो । वृक्षरोपण गरिएको विरुवाहरुमा सल्ला, एभोकाडो, धुपी, खयर, तेजपात, उत्तिस, रुद्राक्ष, कल्की, गोब्रेसल्ला, गुराँस लगायतका प्रजातिका रहेको प्रचार तथा प्रकाशन विभाग प्रमुख राईले बताए । वृक्षरोपण पश्चात् आयोजित समाजवाद र कमरेड पुष्पलाल विषयक कार्यक्रमका वक्ताहरुले पुष्पलालले देखाएको बाटो कम्युनिष्टहरुले भुल्दै गएकाले चिन्ता व्यक्त गरे ।

मुलुकको तीनै तहमा दुई तिहाईको बहुमत प्राप्त कम्युनिष्ट पार्टीको सरकार भएपनि गुट र उपगुटले पार्टी नै कमजोर बन्दै गएकाले जनताको अपेक्षा अनुसार सरकारले काम गर्न नसकेको आरोप लगाए । अन्तरक्रिया कार्यक्रममा बोल्दै नेकपाका अग्रज नेता गोपाल गुराँगाईले पार्टीमा देखिएको गुट उपगुटले कम्युनिष्ट पार्टी कमजोर बन्दै गएको बताउँदै सबै कम्युनिष्टहरु एक हुनु पर्नेमा जोड दिए । युवा संघका केन्द्रीय सदस्य बलदीप राईले सर्वहाराको पार्टी कम्युनिष्ट पार्टीको सरकार भएपनि नेताहरुको व्यक्तिगत स्वार्थका कारण जनताको भावना अनुरुप काम गर्न नसकेको बताए ।

उनले भने–‘हाम्रा नेताहरुबाट समृद्ध मुलुक निर्माण संम्भव नभएकाले अबको नेतृत्व युवाहरुलाई दिनु पर्ने बताए । युवाहरुबाट मात्र संस्थापक महासचिव पुष्पलाल श्रेष्ठले देखेको सपना पुरा हुने समेत ठोकुवा गरे ।’ जिल्लाका सातै तहमा जिल्ला पार्टीका नेताहरुको सहभागितामा अन्तरक्रिया कार्यक्रम आयोजना गरिएको थियो । उक्त कार्यक्रमले कम्युनिष्ट पार्टीका संस्थापक महासचिव श्रेष्ठले पार्टी स्थापनामा पुर्याएको योगदान, पार्टीको बैचारिक तथा संगठनात्मक जगको निर्माणमा सहयोग पुगेको प्रचार तथा प्रकाशन विभाग प्रमुख राईद्धारा हस्ताक्षरित विज्ञप्तिमा उल्लेख छ ।