देशीलाईनमा कालोपत्रे सम्पन्न, मेयर र उपमेयरद्वारा उदघाटन

धरान । कालोपत्रे सडक निर्माणमा दु्रतगती लिएको शहरको रुपमा धरानलाई चिनिने गरिन्छ । यहाँ बनेका चिल्ला सडकहरु र जनता सँगको साझेदारीमा बनेका सडकहरु हेर्न र अवलोकन गर्न बाहिरी शहरहरु बाट पनि आउने गर्दछन् ।

जनप्रतिनिधीहरुले स्थानीय तह संचालन गर्न थाले पछि त झन कालोपत्रे सडक निर्माणको होडबाजीनै चलेको छ । थुप्रै सडकहरु यस वर्ष कालोपत्रे बने । यसै बिच धरानको मुख्य बजार नै रहेको धरान २ स्थित देशीलाईनमा पनि कालोपत्रे सडक सम्पन्न भएको छ ।

विगतको ४० फुट बाटो भत्काएर ५० फुटको बनेको कालोपत्रे सडक धरान उपमहानगरपालिकाका मेयर तिलक राई र उपमेयर मञ्जु भण्डारी सुवेदीले आइतबार संयुक्त रुपमा उदघाटन गरेका छन् । नगरगौरबको योजनामा रहेको देशिलाईनको सडक निर्माण गर्न १ करोड ३५ लाख ४५ हजार ९९ रुपैयाको लागत रहेको छ । उपभोक्ता समितीले २०७६ साल भदौ १७ गते सम्झौता गरि करिब १० महिनामै सडक निर्माण सम्पन्न गरेका हुन् ।