_1693980289.gif "#")
धरान । धरान स्थित वीपी कोइराला स्वास्थ्य विज्ञान प्रतिष्ठानको माइक्रोबायोलोजि विभागमा गरिएको पछिल्लो ८ दिन यताको कोरोना परिक्षणको रिपोर्ट नेगेटिभ देखिएको छ ।
वैशाख १३ गतेको परिक्षणमा १ जनामा कोरोना पोजिटिभ देखिए सँगै १३ जनामा कोरोना पोजिटिभ पुष्टि भएको थियो । त्यस यता वैशाख २० सम्मको ल्याबको परिक्षण नेगेटिभ देखिएको छ । प्रतिष्ठानमा पछिल्लो ८ दिन यता ५ सय २१ जनाको स्वाब परिक्षण गरिएको छ । कुल ९ सय ३८ जनामा गरिएको परिक्षणमा १३ जनामा पोजिटिभ देखिएको छ भने ९ सय २५ जनाको रिपोर्ट नेगेटिभ आएको छ ।प्रतिष्ठानका अनुसार बीपी कोइराला स्वास्थ्य विज्ञान प्रतिष्ठानमा कार्यरत प्रहरी र स्वास्थ्यकर्मीहरुको पिसिआर परीक्षण पनि नेगेटिभ आएको छ । गत बिहीबार लिइएको स्वाबको रिपोर्ट कोरोना नभएको आएको प्रतिष्ठानको माईक्रोबायोलोजी विभागले जनाएको छ । प्रतिष्ठानमा कार्यरत ७ जना प्रहरी र बिरामीको उपचारमा खटिएका स्वास्थ्यकर्मीको टोलीलाई क्वारेन्टाईनमा राखिएको थियो ।
बीपी कोइराला स्वास्थ्य विज्ञान प्रतिष्ठानको आकस्मिक कक्षसँगै रहेको प्रतिष्ठान प्रहरी पोस्टमा कार्यरत प्रहरी ७ जनाकै नेगेटिभ रिपोर्ट आएकोले उनीहरूलाई पुनः सई दुर्गा पराजुलीकै कमान्डमा प्रतिष्ठानमा डिउटी खटाई सकिएको इलाका प्रहरी कार्यालय धरानका प्रमुख डिएसपी ढुण्डिराज न्यौपानेले जानकारी दिएका छन् ।
