धरान/धरान उपमहानगरपालिका–६ पानबारीस्थित सरस्वती माध्यमिक विद्यालयमा सामाजिक विषयका शिक्षकको पद आठ महिनादेखि रिक्त रहँदा पठनपाठन प्रभावित भएको छ।
आगामी एसईई परीक्षाको तयारीमा रहेका विद्यार्थीसमेत शिक्षक अभावका कारण प्रत्यक्ष मारमा परेका छन्।
शिक्षक नियुक्तिको विषयलाई लिएर वडा अध्यक्ष भूपेन्द्र भट्टराई र धरानका कार्यवाहक नगर प्रमुख अईन्द्र विक्रम बेघाबीच सार्वजनिक रूपमा आरोप–प्रत्यारोप सुरु भएको छ।
वडा कार्यालयमा पत्रकार सम्मेलन गर्दै वडा अध्यक्ष भट्टराईले शिक्षक नियुक्तिका लागि पटक–पटक नगरपालिकासँग आग्रह गर्दा पनि समस्या समाधान नभएको आरोप लगाए।
विद्यालयका प्रधानाध्यापक होमनाथ दाहालले पनि तत्कालीन प्रधानाध्यापक गंगाप्रसाद धमला अनिवार्य अवकाशमा गएपछि सामाजिक विषयको शिक्षक पद रिक्त रहेको बताए।
सामाजिक विषय पढाउने शिक्षक नहुँदा अन्य शिक्षकले आफ्ना नियमित कक्षासँगै थप कक्षा लिनुपरेको विद्यालयको भनाइ छ। एउटै कक्षामा ४० देखि ४५ जनासम्म विद्यार्थी रहेकाले दुईवटा कक्षा मिलाएर पढाउनुपर्ने अवस्था आएको छ।
विद्यालयमा लेखापालको पदसमेत रिक्त छ। विज्ञापन खुलाएर ६ जनाको आवेदन परे पनि परीक्षा र नियुक्ति प्रक्रिया अघि बढ्न सकेको छैन।
यता कार्यवाहक नगर प्रमुख बेघाले नगरपालिकाले जानाजानी शिक्षक नियुक्ति रोकेको आरोप अस्वीकार गरेका छन्।
विद्यालय व्यवस्थापन समितिका अध्यक्ष र प्रधानाध्यापक तथा शिक्षक पक्षबीचको आन्तरिक विवादका कारण समस्या समाधान हुन नसकेको उनको दाबी छ।
उनले दुवै पक्षलाई पटक–पटक बोलाएर सहमतिको प्रयास गरिएको बताए।
रिक्त पदमा नियमअनुसार सार्वजनिक सूचना निकालेर योग्य व्यक्ति छनोट गर्नुपर्नेमा केही पक्षले अस्थायी रूपमा आफूअनुकूल व्यक्ति नियुक्त गर्न खोजेको हुनसक्ने उनको आशंका छ।
विद्यालयको शिक्षक अभावको विषयमा सुरु भएको विवाद अब धरान–६ का वडा अध्यक्ष र कार्यवाहक नगर प्रमुखबीचको आरोप–प्रत्यारोपमा परिणत भएको छ।
तर विवादबीच सबैभन्दा बढी असर भने पढाइबाट वञ्चित भइरहेका विद्यार्थीलाई परेको छ।
