धरान/ नेपाल कम्युनिष्ट पार्टी (एमाले) धरान उपमहानगर कमिटीले पार्टी अध्यक्ष एवं पूर्व प्रधानमन्त्री केपी शर्मा ओली र नेपाली कांग्रेसका नेता तथा पूर्व गृहमन्त्री रमेश लेखकलाई राज्यले गरेको पक्राउको कडा शब्दमा विरोध गरेको छ।
शनिबार (चैत १४) बिहान भएको उक्त पक्राउलाई कमिटीले “प्रतिशोधपूर्ण, पूर्वाग्रही र गैरकानुनी” भन्दै लोकतान्त्रिक मूल्य र कानुनी शासनविपरीत भएको ठहर गरेको छ।
कमिटीका अध्यक्ष हर्कजंग एभेङद्वारा जारी प्रेस वक्तव्यमा दुवै नेताको तत्काल रिहाइको माग गरिएको छ।
वक्तव्यमा भदौ २३ र २४ गतेको घटनाको छानबिनका लागि गठन गरिएको गौरीबहादुर कार्की आयोगप्रति सर्वोच्च अदालतले समेत गम्भीर प्रश्न उठाएको उल्लेख गर्दै उक्त आयोगको प्रतिवेदन पूर्वाग्रही र न्यायिक सिद्धान्तविपरीत रहेको दाबी गरिएको छ।
साथै, निष्पक्ष छानबिनका लागि सर्वोच्च अदालतका बहालवाला न्यायाधीशको अध्यक्षतामा उच्चस्तरीय आयोग गठन गर्न माग गरिएको छ।
एमाले धरानले पक्राउको विरोध, नेताहरूको रिहाइ, कानुनी शासन, लोकतन्त्र र मानवअधिकारको रक्षाका लागि सबै राजनीतिक दल, नागरिक समाज र आमजनसमुदायलाई संयुक्त पहल गर्न आग्रह गरेको छ।
वक्तव्यमा यस घटनालाई संविधान, लोकतन्त्र र मानवअधिकारका पक्षधरहरूलाई चिन्तित बनाउने कदमको रूपमा चित्रण गर्दै कानुनी र राजनीतिक रूपमा प्रतिवाद गरिने पनि उल्लेख छ।
साथै, पार्टीपंक्ति र आम नागरिकलाई विचलित नभई लोकतन्त्र र जनताको पक्षमा दृढतापूर्वक अघि बढ्न आह्वान गरिएको छ।
