-फाइल तस्बिर
धरान/सुनसरीको धरान उपमहानगरपालिका–८ शनि मन्दिर नजिक यात्रुबाहक बसको ठक्करबाट एक वृद्धको ज्यान गएको छ।
इटहरीबाट धरानतर्फ आउँदै गरेको प्रदेश–१–०२–००२ ख ०६९७ नम्बरको बसले बाटो काट्दै गरेका करिब ६०–६५ वर्षका पुरुषलाई साेमबार साँझ ठक्कर दिएको प्रहरीले जनाएको छ।
ठक्करबाट गम्भीर घाइते भएका उनलाई तत्काल वीपी कोइराला स्वास्थ्य विज्ञान प्रतिष्ठान, धरानमा उपचारका लागि लगिएको थियो। तर, उपचारको क्रममा(साेमबार) राति करिब ८ः५८ बजे उनको मृत्यु भएको अस्पतालले जनाएको छ।
घटनापछि बस चालक धरान–१५ का ३७ वर्षीय भीमबहादुर प्रधानलाई इलाका प्रहरी कार्यालय धरानको नियन्त्रणमा लिइएको छ। दुर्घटनाबारे थप अनुसन्धान भइरहेको प्रहरीले जनाएको छ।
