धरान/ सुनसरीको इनरुवामा एक हृदयविदारक घटना सार्वजनिक भएको छ । इनरुवा नगरपालिका–९ बबियास्थित एक घरमा आइतबार बिहान पति–पत्नी मृत अवस्थामा फेला परेपछि स्थानीय स्तब्ध छन् ।
करिब ३५ वर्षीय सुकदेव शर्मा र उनकी २३ वर्षीया पत्नी सवेता खातुन आफ्नै घरभित्र रहस्यमय ढंगले मृत भेटिएको जिल्ला प्रहरी कार्यालय सुनसरीका प्रमुख एसपी सुमनकुमार तिम्सिनाले जानकारी दिए ।
उनका अनुसार बाँसको टाटीले बारिएको एकतले कच्ची घरको छानाको धुरीमा सुकदेव शर्मा झुन्डिएको अवस्थामा फेला परेका हुन् भने सवेता ओछ्यानमै मृत भेटिइन् ।
स्थानीय बासिन्दाले आइतबार बिहान करिब ९ बजेतिर दम्पतीको शव देखेपछि प्रहरीलाई खबर गरेका थिए । त्यसपछि डीएसपी योगराज खतिवडाको नेतृत्वमा प्रहरी टोली घटनास्थलमा पुगेर अनुसन्धान सुरु गरेको छ ।
दुबैको शव हालसम्म घटनास्थलमै रहेको प्रहरीले जनाएको छ । शव उठाउने प्रक्रिया सवेता खातुनको माइती पक्ष मोरङ, कदमाहबाट आएपछि मात्रै अघि बढाइने प्रहरीले स्पष्ट पारेको छ ।
“घटनाको प्रारम्भिक जानकारी हामीले लिएका छौँ, तर मृत्युको कारण अझै यकिन भइसकेको छैन,” एसपी तिम्सिनाले भने, “माइती पक्ष आइपुगेपछि कानुनी प्रक्रिया अघि बढ्छ र विस्तृत अनुसन्धानबाट मात्र यथार्थ खुल्नेछ ।”
घटनास्थल जिल्ला प्रहरी कार्यालय सुनसरीबाट करिब तीन किलोमिटर पूर्व पर्छ । यस घटनाले इनरुवा क्षेत्रमा शोकको छायाँ छाएको छ ।
