प्रतिनिधि तस्बिर
धरान/ सुनसरीको धरान उपमहानगरपालिका–१७ साउने बस्तीमा एक महिलाले घरायसी विवादका क्रममा आफ्नै श्रीमानमाथि छुरा प्रहार गरेकी छन्।
आइतबार राति करिब ९ः३० बजे सरिता राईले आफ्ना ५० वर्षीय श्रीमान वीर बहादुर राईमाथि तरकारी काट्ने छुराले प्रहार गरेकी हुन्।
छुरा प्रहारबाट राईको दाहिने हातको पञ्जा, छाती र पेटमा चोट लागेको जिल्ला प्रहरी कार्यालय सुनसरीले जनाएको छ।
घाइते राईलाई तत्काल बीपी कोइराला स्वास्थ्य विज्ञान प्रतिष्ठान, धरानमा भर्ना गरिएको छ। उनको अवस्था मध्यम रहेको बताइएको छ।
घटनापछि इलाका प्रहरी कार्यालय धरानबाट खटिएको टोलीले ३१ वर्षीया सरिता राईलाई नियन्त्रणमा लिएको छ। घटना धरान रेल्वे नजिकैको अस्थायी प्रहरी चौकीबाट करिब ३ किलोमिटर पश्चिममा भएको हो।
प्रहरीको प्रारम्भिक अनुसन्धान अनुसार, घटनाको कारण घरायसी विवाद रहेको खुलेको छ। घटनाबारे थप अनुसन्धान भइरहेको प्रहरीले जनाएको छ।
