_1693980289.gif "#")
विराटनगर/ मोरङको रतुवामाई नगरपालिका–६ मा अंश सम्बन्धी झगडाले एक परिवारमा कहालीलाग्दो मोड लिएको छ।
पुर्ख्यौली सम्पत्तिको विवादका कारण बोल्न नसक्ने महिला टीकामाया कार्की बस्नेतको आफ्नै देवर टंकबहादुर बस्नेतले निर्मम हत्या गरेका छन्।
टीकामाया ६० वर्षीया महिला थिइन्, जो बोल्न सक्दिनथिन्। इसारामार्फत मात्र संवाद गर्ने उनी असार २१ गते दिउँसो बारीमा घाँस काट्न गएका बेला मृत अवस्थामा फेला परिन्। प्रारम्भिक अनुसन्धानमा घाँटीमा गहिरो चोट देखिएपछि प्रहरीले अनुसन्धान अघि बढाएको थियो।
प्रहरीका अनुसार ६९ वर्षीय टंकबहादुरले हँसियाको बिँडले प्रहार गरी भाउजूको हत्या गरेका हुन्। घटनामा प्रयोग भएको हँसिया समेत उनको घरबाट बरामद गरिएको छ। इलाका प्रहरी कार्यालय सिजुवाको टोलीले टंकलाई सोमबार दिउँसो आफ्नै घरबाट पक्राउ गरेको हो।
मृतक टीकामायाका श्रीमान् गणेशबहादुर बस्नेत र उनका सौतेनी भाइ टंकबहादुरबीच विगत केही वर्षदेखि पुर्ख्यौली सम्पत्तिको बँडफाँटका विषयमा विवाद चलिरहेको थियो। अदालतले दाजु गणेशलाई अंश पाउने ठहर गरेपछि टंक असन्तुष्ट बनेको प्रहरीको अनुसन्धानबाट खुलेको छ।
मृतकलाई पटक–पटक लक्षित गर्दै आक्रोश झल्काउने गरेको खुलासा
मोरङ प्रहरीका प्रवक्ता डीएसपी कोपिला चुँडालका अनुसार टंकले विगतमा पनि टीकामायालाई लक्षित गर्दै गालीगलौज र आक्रोशपूर्ण व्यवहार गर्दै आएको प्रमाणहरू संकलन गरिएका थिए। “हामीसँग पहिलेको विवाद र आक्रोशका प्रमाण छन्। अहिले थप प्रमाण संकलनको काम भइरहेको छ,” उनले भनिन्।
प्रहरीले टंकविरुद्ध कर्तव्य ज्यान मुद्दा दर्ता गरी अदालतबाट म्याद थप गर्दै थप अनुसन्धान अघि बढाएको जनाएको छ। पारिवारिक सम्पत्तिको लोभमा भएको यो हत्याले मोरङ क्षेत्रको समाजमा दुःखद तरंग ल्याएको छ।
