_1693980289.gif "#")
धरान/आज हिन्दू धर्मावलम्बीहरूले आस्था र श्रद्धापूर्वक हरिशयनी एकादशी मनाइरहेका छन् । आषाढ शुक्ल पक्षको एकादशीका दिन मनाइने यो पर्वलाई देवशयनी एकादशी पनि भनिन्छ ।
धार्मिक मान्यताअनुसार आजको दिनदेखि भगवान् विष्णु क्षीरसागरमा चार महिनाका लागि शयनमा जानुहुन्छ र चतुर्मास सुरु हुन्छ ।
धरान, इनरुवा, इटहरी लगायतका शहर तथा गाउँका मन्दिरहरूमा बिहानैदेखि भक्तजनको भिड लागेको छ । व्रत, पूजा तथा तुलसीको बिरुवा सार्ने परम्परागत अभ्यास आज विशेष रूपमा सम्पन्न गरिँदैछ ।
हरिशयनी एकादशीको दिन घर–घरमा गमलामा रहेको तुलसीको बिरुवा जमिनमा सार्ने चलन छ । यसलाई शुभ कार्यको सुरुआतको संकेत मानिन्छ । विष्णुका प्रिय वनस्पति मानिने तुलसीलाई यस दिन विशेष पूजा गरिन्छ ।
आजदेखि सुरु हुने चतुर्मासको अवधिमा विवाह, ब्रतबन्ध, गृहप्रवेश, दीक्षा, यज्ञ आदि शुभकार्य नगर्नु पर्ने धार्मिक मान्यता छ । भाद्र शुक्ल एकादशी अर्थात हरिबोधिनी एकादशीका दिन भगवान् विष्णु शयनबाट उठ्नुहुने जनविश्वास छ ।
काेशी प्रदेशका मठ–मन्दिरमा भक्तजनहरूको घुइँचो लागेको छ । कतिपय मठमन्दिरमा रातभर भजन, कीर्तन र जागरणको कार्यक्रम पनि तय गरिएको छ ।
धार्मिक विश्वास अनुसार यो एकादशी व्रत लिंदा पाप क्षय हुने र मोक्ष प्राप्त हुने जनविश्वास छ ।
