_1693980289.gif "#")
फाइल तस्बिरमा
जनकपुरधाम/धनुषाको नेपाल–भारत सीमावर्ती क्षेत्रमा सशस्त्र प्रहरी र तस्करबीच भीडन्त भएको छ । उक्त घटनामा ६ जना सशस्त्र प्रहरी घाइते भएका छन् ।
घाइतेहरुको जनकपुरस्थित प्रादेशिक अस्पतालमा उपचार भइरहेको छ ।
धनुषाको विदेह नगरपालिका–२ अन्तर्गत वैदेही दुहबी क्षेत्रको नेपाल–भारत सीमास्थलमा बिहीबार साँझ ७ बजेतिर घटनाको सुरुवात भएको हो ।
सशस्त्र प्रहरी उपरीक्षक (एसपी) निर्मल खड्काका अनुसार तस्करीको सामान नेपाल भित्र्याएर आँपको बगैंचामा राखिएको भन्ने गोप्य सूचनाका आधारमा ३० जना सशस्त्र प्रहरीको टोली त्यस क्षेत्रमा पुगेको थियो ।
सशस्त्र प्रहरी पुगेलगत्तै तस्करको समूहले भाटा, घरेलु हतियार र ढुंगामुढा प्रयोग गरी आक्रमण गरेपछि स्थिति नियन्त्रणमा लिन प्रहरीले जवाफी कारबाही गरेको हो ।
घटनामा उग्र बन्दै गएको भीडलाई तितरबितर पार्न प्रहरीले १३ राउण्ड अश्रुग्यास र ४ राउण्ड हवाई फायर गर्नुपरेको एसपी खड्काले जानकारी दिए ।
भीडन्तपछिको अवस्था अहिले नियन्त्रणमा रहेको जनाइएको छ । घटनासम्बन्धी थप अनुसन्धान भइरहेको प्रहरीले जनाएको छ ।
