धरान/ सुनसरीको धरान उपमहानगरपालिका–१३ स्थित निशाने डाँडामा लागू औषध गाँजासहित एकजना व्यक्ति पक्राउ परेका छन्।
असार १६ गते दिउँसो १२:३० बजे विशेष सूचनाका आधारमा अस्थायी प्रहरी चौकी अमरहाटबाट खटिएको प्रहरी टोलीले धनकुटाबाट धरानतर्फ आउँदै गरेको बा. ३ ख. १८९७ नम्बरको यात्रुबाहक बस चेकजाँच गर्दा सो बसको प्यासेजमा राखिएका दुई वटा बोरामा केराको पात र तितेपातीको झुपाले बेरेर राखिएको अवस्थामा गाँजा जस्तो देखिने लागू औषध फेला परेको हो।
जम्मा ५५ केजी तौल भएको उक्त गाँजाका बोराहरु सोही बसमा सवार धनकुटा सहिदभुमि गाउँपालिका–२ का ५४ वर्षीय तेज बहादुर राईको भएको खुलेको प्रहरीले जनाएको छ।
प्रहरीले राईलाई उक्त लागू औषध गाँजासहित नियन्त्रणमा लिई थप अनुसन्धानका लागि इलाका प्रहरी कार्यालय धरानमा ल्याएको छ। घटनाबारे आवश्यक अनुसन्धान भइरहेको प्रहरीले जानकारी दिएको छ।
