सुनसरी/ धरानबाट कालाबञ्जारतर्फ जङ्गल हुँदै गइरहेको अवस्थामा बराहक्षेत्र नगरपालिका–५ स्थित अमहा सिमसार क्षेत्रमा छाडिएको कारबाट प्रहरीले अत्याधुनिक राइफल बरामद गरेको छ । प्रहरीलाई देखेपछि कारभित्र रहेका व्यक्ति जङ्गलतर्फ फरार भएका छन् ।
जिल्ला प्रहरी कार्यालय सुनसरीका प्रवक्ता डीएसपी योगराज खतिवडाका अनुसार धरानबाट जङ्गल हुँदै गइरहेको बा ६ च ८४०३ नम्बरको कालो रङको कारलाई सोमबार राति करिब १ बजे शंका लागेर प्रहरी टोलीले रोक्न खोजेको थियो । प्रहरीलाई देखेपछि कारभित्र सवार ४–५ जना व्यक्ति भागेका थिए ।
इलाका प्रहरी कार्यालय महेन्द्रनगरबाट खटिएको इन्स्पेक्टर दिवस कुँवर नेतृत्वको टोलीले घटनास्थलमा कार खानतलासी गर्दा ‘मेड इन इङल्याण्ड’ लेखिएको एक थान अत्याधुनिक राइफल फेला परेको प्रहरीले जनाएको छ ।
भागेका व्यक्तिहरूको खोजीका लागि जङ्गल क्षेत्रमा व्यापक रूपमा सर्च अपरेशन चलाइएको छ । तर हालसम्म उनीहरू फेला नपरेको र खोजी तीव्र पारिएको जिल्ला प्रहरी प्रमुख एसपी सुमनकुमार तिम्सिनाले जानकारी दिएका छन् ।
बरामद गरिएको राइफल र कार इलाका प्रहरी कार्यालय महेन्द्रनगरमा राखेर थप अनुसन्धान अघि बढाइएको प्रहरीले जनाएको छ ।
