दुहबी/ सुनसरी जिल्लाको दुहबी नगरपालिका–११ स्थित तनमुना क्षेत्रबाट प्रहरीले लागू औषध गाँजाको ठूलो खेप बरामद गरेको छ।
विशेष सूचनाको आधारमा गरिएको प्रहरी कारबाहीमा ४३८ किलो गाँजा सहित भारतिय नम्बर प्लेटको स्कार्पियो गाडी नियन्त्रणमा लिइएको हो।
इलाका प्रहरी कार्यालय दुहबीका प्रहरी निरीक्षकको कमाण्डमा प्रहरी चौकी तनमुना र प्रहरी चौकी रामगञ्ज वेलगछिया (शुक्रबारे) बाट संयुक्त रुपमा खटिएको टोलीले मिति २०८२।०२।१५ गते बिहान ३:०० बजे तिर तनमुना नहरचोक–शुक्रबारे भित्री सडकखण्डमा चेकजाँचको क्रममा भारततर्फबाट आउँदै गरेको WB 06 H 2858 नम्बरको भारतीय स्कार्पियोलाई रोकेको थियो।
तर प्रहरी टोलीलाई देख्नेबित्तिकै चालक स्कार्पियो छाडेर फरार भएका थिए। त्यसपछि स्कार्पियो गाडीलाई कानुनी प्रक्रिया अनुसार खानतलासी गर्दा प्लास्टिकका पोकामा प्याक गरिएको १४ पोका गाँजा फेला परेको हो। ती पोकाको तौल जम्मा ४३८ केजी रहेको प्रहरीले जनाएको छ।
हाल बरामद गाँजा र स्कार्पियो गाडी इलाका प्रहरी कार्यालय दुहबीमा राखिएको छ भने फरार चालकको पहिचान र पक्राउको लागि अनुसन्धान भइरहेको छ।
प्रहरी स्रोतका अनुसार, यो बरामदलाई पछिल्लो समयको ठुलो सफलताका रूपमा लिइएको छ र लागू औषध तस्करीमा संलग्न समूहहरू विरुद्ध निगरानी थप कडाइ गरिने जनाएको छ।
