झापा/ झापाको कनकाई नगरपालिका–५ स्थित सुरुङ्गा–झापा सडकखण्डमा प्रहरीले करिब २०० ग्राम प्रतिबन्धित लागुऔषध ‘ब्राउनसुगर’ बरामद गरेको छ।
जिल्ला प्रहरी कार्यालय झापाका प्रवक्ता प्रहरी नायब उपरीक्षक (डीएसपी) खगेन्द्रबहादुर खड्काका अनुसार शरणामतीबाट सुरुङ्गातर्फ आइरहेको भारतीय नम्बर प्लेट (BR 37 T 9198) को मोटरसाइकलमा रहेको झोलाबाट उक्त परिमाणको ब्राउनसुगर फेला परेको हो।
आज बिहान करिब ८ः४० बजे प्रहरी टोलीले शङ्कास्पद मोटरसाइकललाई रोकेर जाँच गर्ने प्रयास गर्दा चालक मोटरसाइकल र झोला छाडेर फरार भएका थिए। प्रहरीलाई देख्नेबित्तिकै उनी फरार भएपछि रोक्न दुई राउन्ड हवाई फायरसमेत गरिएको डीएसपी खड्काले जानकारी दिए।
फरार व्यक्तिको खोजी जारी रहेको प्रहरीले जनाएको छ।
