धनकुटा/ सशस्त्र प्रहरीको चेकजाँचबाट बच्न खोज्दा भागेको एक कार धनकुटाको साँगुरीगढी गाउँपालिका–६ स्थित नमस्ते झरना नजिकै दुर्घटनाग्रस्त अवस्थामा फेला परेको छ। सो कारबाट ठूलो परिमाणमा लागुऔषध गाँजा बरामद गरिएको छ।
सशस्त्र प्रहरीले जनाए अनुसार चेकजाँचका क्रममा भागेको को २ प १७३४ नम्बरको उक्त कारलाई मुलघाट क्षेत्रबाट नियन्त्रणमा लिन खोज्दा चालक फरार भएका थिए। पछि खोजीका क्रममा नमस्ते झरनामा बेवारिसे अवस्थामा कार फेला परेको हो।
दुर्घटनामा परेको अवस्थामा फेला परेको कारको खानतलासी गर्दा १२ वटा पोकामा प्याक गरिएको ४ सय २१ किलो गाँजा भेटिएको सशस्त्र प्रहरी बलले जनाएको छ।
कारका चालक भने अझै फेला परेका छैनन्। सशस्त्र प्रहरीले बरामद लागुऔषधसहितको कार आवश्यक अनुसन्धान तथा कानुनी कारबाहीका लागि नेपाल प्रहरीलाई जिम्मा दिने तयारी गरिरहेको जनाएको छ।
