_1693980289.gif "#")
उदयपुर/उदयपुरको गाईघाटबाट झापाको काँकडभिट्टा जाँदै गरेको यात्रुबस आइतबार मध्यान्ह दुर्घटनामा पर्दा तीन जनाको ज्यान गएको छ भने २३ जना घाइते भएका छन्।
पूर्व–पश्चिम राजमार्गअन्तर्गत सप्तरीको कन्चनरुप नगरपालिका–१० स्थित बदगामा बस अनियन्त्रित भई पल्टिएको हो।
इलाका प्रहरी कार्यालय कन्चनपुरका डीएसपी माधवप्रसाद काफ्लेले बस आफैं अनियन्त्रित भएर पल्टिएको जानकारी दिए।
दुर्घटनामा सप्तरीको सप्तकोशी नगरपालिका–१ निवासी ७५ वर्षीय रत्नबहादुर मगरातीसहित एक पुरुष र एक महिलाको मृत्यु भएको हो।
गम्भीर घाइते भएका मगरातीलाई उपचारका लागि विराटनगर ल्याइए पनि अस्पतालमा पुगीसकेपछि चिकित्सकले मृत घोषणा गरेका थिए।
अन्य दुई जनाको बसले च्याप्दा घटनास्थलमै ज्यान गएको प्रहरीले जनाएको छ। मृतक दुईजनाको पहिचान खुल्न बाँकी छ।
बसमा ३५ जना यात्रु सवार थिए। दुर्घटनामा घाइते भएका २३ जनामध्ये केहीको अवस्था गम्भीर रहेको छ भने केही सामान्य छन्। घाइतेहरूलाई विराटनगरस्थित गोल्डेन अस्पताल र कन्चनरुप नगर अस्पतालमा उपचार गरिँदैछ।
घाइते हुनेहरूमा सुवेता दाहाल, चेतना भट्टराई, विजय विक, मनोज भट्टराई, मीना भट्टराई, कमला भुसाल, नरमाया मगर, भरत यादव, महमद असलम, वीरेन्द्र ठाकुर, सविता थापा, सुष्मा विष्ट, पवित्रा मगराती, विमलादेवी ठाकुर, मायादेवी थापा, श्याकुमार सदा, मनोज सदा, सनावती चौधरी, निर्मला गुप्ता, पुजनदेवी सिलवाल, गीता सिलवाल र बमबहादुर कार्की रहेका छन्।
बस चालक झापा मेचीनगर–७ का ४७ वर्षीय अमृत दर्जीलाई प्रहरीले नियन्त्रणमा लिएको छ। दुर्घटनाको कारणबारे थप अनुसन्धान भइरहेको प्रहरीले जनाएको छ।
