विराटनगर/ मोरङको कटहरी गाउँपालिका–१ का ४५ वर्षीय प्रमोद महतोको विषादी सेवनपछि निधन भएपछि विराटनगरस्थित नोबेल शिक्षण अस्पतालमा हुलदंगा र तोडफोड भएको छ।
गम्भीर अवस्थामा रहेका महतोको बिहीबार साँझ कोशी अस्पताल हुँदै नोबेल शिक्षण अस्पतालमा उपचार भइरहेकै क्रममा राति ११ बजे निधन भएको हो।
विष सेवन गरेको प्रारम्भिक पुष्टि भइसकेको छ भने उनकी पत्नी अनितादेवीले विष सेवनको कारण थाहा नभएको बताएकी छन्।
मृत्युको खबर फैलिएसँगै शुक्रबार बिहान १:३० बजे दर्जनौं आफन्त र छिमेकी अस्पताल पुगेका थिए।
उनीहरूले चिकित्सकको लापरबाहीका कारण मृत्यु भएको आरोप लगाउँदै तोडफोड र ढुंगामुढा सुरु गरे।
मोरङका प्रहरी प्रमुख एसपी नारायणप्रसाद चिमरियाका अनुसार, भिडले ओपीडीको सिसा फुटाएका थिए भने ढुंगामुढामा परी इन्स्पेक्टर राजेश दत्त घाइते भएका छन्।
स्थितिलाई नियन्त्रणमा लिन ठूलो संख्यामा प्रहरी खटाइएको थियो। अहिले अवस्था सामान्य भइसकेको छ। प्रहरीले घटनामा संलग्न ७ जनालाई पक्राउ गरेको छ र अन्यको खोजी भइरहेको बताइएको छ।
