धरानमा भेटिएको शवको रहस्य: चोटपटकसहित फेला परेकी महिलाको पहिचान खुल्यो

धरान/  धरान उपमहानगरपालिका–६ स्थित पाँचकन्या सामुदायिक वनमा सोमबार दिउँसो एक महिलाको शव शंकास्पद अवस्थामा फेला परेको थियो।

प्रहरीका अनुसार मृतकको पहिचान हाल इटहरी–२, हलगडामा बसोबास गर्दै आएकी धनकुटा महालक्ष्मी नगरपालिका–२ माइती भएकी ३४ वर्षीया चुन कुमारी  दाहालका रूपमा खुलेको छ।

शव फेला परेको स्थानमा गरिएको प्रारम्भिक अनुसन्धानमा आपराधिक संलग्नताको आशंका गरिएको छ।

घटनास्थलमा पुगेका प्रहरीका अनुसार महिलाको शरीरमा चोटपटक देखिएको छ भने कपडा पनि अव्यवस्थित अवस्थामा थियो। शव केही मिटर घिसारिएको जस्तो देखिएको छ भने अनुहारमा समेत चोट लागेको पाइएको छ।

यद्यपि, घटनास्थलमा धारिलो हतियार प्रयोग भएको प्रमाण भने फेला परेको छैन। शव घिसारिँदा कपडा खुलेको हुन सक्ने प्रहरीको अनुमान छ।

घटनाको यथार्थ पत्ता लगाउन अनुसन्धान भइरहेको र मृतकको शव धरानस्थित बिपी कोइराला स्वास्थ्य विज्ञान प्रतिष्ठानमा पोस्टमार्टमका लागि राखिएको प्रहरीले जनाएको छ। रिपोर्टपछि घटनाको प्रकृति थप स्पष्ट हुने आशा गरिएको छ।