वराहक्षेत्र मेयर लिग कप : वडा नं २ फाइनलमा संगम बिष्ट

वराहक्षेत्र/  वराहक्षेत्र नगरपालिकामा जारी तेस्रो संस्करणको वडा स्तरीय वराहक्षेत्र मेयर लिग कप रनिङ्ग शिल्ड फुटबल प्रतियोगिता अन्तर्गत शनिबार सम्पन्न पहिलो सेमिफाइनल खेलमा वडा नं २ विजयी भएको छ।

वडा नं २ ले वडा नं १० लाई १-० को अन्तरले पराजित गर्दै फाइनलको यात्रा तय गरेको हो।

खेलको एक मात्र निर्णायक गोल गर्ने दिपेश तामाङ्ग म्यान अफ द म्याच घोषित भए। उनले नगद २,१०० रुपैयाँ र ट्रफी प्राप्त गरे।

अब वडा नं २ ले उपाधिका लागि वडा नं ५ र वडा नं ९ बीच आइतबार हुने दोस्रो सेमिफाइनल खेलको विजेतासँग प्रतिस्पर्धा गर्नेछ।

यसअघि क्वार्टरफाइनल चरणमा वडा नं ५ ले वडा नं ४ लाई र वडा नं १० ले वडा नं ३ लाई पराजित गर्दै सेमिफाइनलमा प्रवेश गरेका थिए।

नगर खेलकुद विकास समितिको आयोजनामा जारी प्रतियोगिता "खेलकुद हाम्रो सान, खेलाडी उत्पादन गर्ने हाम्रो अभियान" भन्ने नाराका साथ सञ्चालन भइरहेको छ।

प्रतियोगिता वराहक्षेत्र नगरपालिका वडा नं ७, देबिघाटस्थित वसन्त ऋतु माध्यमिक विद्यालयको खेलमैदानमा भइरहेको छ।