भोजपुर ट्रेल रेस चैत १२ मा

धरान । कोभीड संक्रमणका कारण दुई वर्ष देखि स्थगित भएको भोजपुर ट्रेल रेसको पाचौं सस्करण चैत्र १२ देखि सन्चालन हुने भएको छ ।

विश्व नम्बर १ अल्ट्रा धाविका मिरा राईको सम्मानमा आयोजना हुने ट्रेल रेस भोजपुरस्थित सानोदुम्मामा सन्चालन हुने मिरा राई फाउण्डेसनका सचिव केशर राईले जानकारी दिए । रेसलाई पौवादुम्मा गाउँपालिकाले केही बजेट विनियोजन गरेको छ भने प्रदेश १ सरकारबाट मौखिक आश्वाशन पाएको छ । ८ देखि दस लाखको बजेटमा सम्पन्न हुने स्पर्धाले ट्रेल रेसको प्रवद्र्धन र नयाँ धावक धाविकालाई प्रोत्साहन गर्ने सचिव राईको भनाइ छ ।

रेसमा अनुमानित ३ सय धावक धाविका सहभागी हुने आयोजकको विश्वास छ । हङकङ, बेलायत, भारत लगायतका देशबाट धावक, धाविका सहभागी हुनेछन् । अन्तर्राष्ट्रिय ट्रेल रेस एसोसियसनमा मान्यता पाएपछि भोजपुर ट्रेलको पहिलो रेस आयोजना हुन लागेको हो भने नेपाली राष्ट्रिय लिगमा यही संस्करणदेखि सहभागी हुनेछ ।

अन्तर्राष्ट्रिय मापदण्ड अनुसार ५० किमी, १० किमी र ४ किमी रेस हुनेछ । गत वर्षको सस्करणको ३६ किमी रेसमा पुरुसतर्फ उमेस राई र महिलातर्फ प्रिया राई प्रथम भएका थिए । रेसका विजेताले महिला र पुरुष स्पर्धामा क्रमश ५० हजार, ३० हजार, २० हजार, १० हजार र ५ हजार नगद रुपैयाँ प्राप्त गर्ने छन् ।

मिरा राईले अध्ययन गरेको सानोदुम्मा माध्यमिक विद्यालयबाट ट्रेल रेस आयोजना सुरु भएको स्पर्धालाई मिरा राई फाउन्डेसनले अपनत्व लिदै निरन्तरता दिएको हो । फाउण्डेशनले ट्रेल रेसबाहेक ३५ लाखको लगानीमा मिरा राई सामुदायिक अध्ययन केन्द्र स्थापना गरेको छ । प्रदेश १ सरकार र वैदेशिक जनश्रमदानबाट अध्ययन केन्द्र स्थापना भएको फाउन्डेसनका उपाध्यक्ष हंसराज राईले जानकारी दिए ।