प्रदेशस्तरीय पुरुष भलिबलको उपाधि दमकलाई

इटहरी/  मोरङको सुन्दरहरैँचास्थित गछियामा सम्पन्न एक नम्बर प्रदेशस्तरीय पुरूष भलिबल प्रतियोगिताको उपाधि झापाको दमकले जितेको छ । आइतबार सम्पन्न फाइनल खेलमा आयोजक जनसहयोग युवा क्लब सुन्दरहरैँचालाई ३–० को सोझो सेटमा पराजित गर्दै दमकले उपाधि जितेको हो ।

उपाधि विजेता दमकले १ लाख १ हजार १ सय ११ रूपैयाँसहित ट्रफी पाएको छ । उपविजेतामा चित्त बुझाउन बाध्य आयोजकले ५१ हजार १ सय ११ रूपैयाँ र ट्रफी पाएको छ ।
यस्तै, आइतबार नै तेस्रो स्थानका लागि भएको खेलमा सुनसरीको रामधुनीलाई पराजित गर्दै विमान ट्रेडर्स बिर्तामोड विजयी भएको छ ।

तेस्रो भएको बिर्तामोडले नगद २५ हजार १ सय ११ रूपैयाँ र ट्रफी हात पारेको छ । शनिबार भएको पहिलो सेमीफाइनल खेलमा विमान ट्रेडर्स बिर्तामोडलाई ३–१ ले पराजित गर्दै आयोजकले फाइलनमा स्थान पक्का गरेको थियो भने दोस्रो सेमीफाइनल खेलमा सुनसरीको रामधुनीलाई ३–१ को सेटमा पराजित गर्दै दमकले भिडन्त पक्का गरेको थियो ।

प्रतियोगितामा विभिन्न विधामा उत्कृष्ट हुने खेलाडीहरूलाई समेत पुरस्कृत गरिएको छ । विजेता तथा उपविजेता खेलाडीहरूलाई सुन्दरहरैँचा नगरपालिकाका प्रमुख शिवप्रसाद ढकाल, वडा ६ का वडाध्यक्ष जीवन राई, नेता केदार गुरागाईं, काङ्ग्रेस नेता भक्ति सिटौलालगायतले पुरस्कार प्रदान गरेका थिए ।

प्रतियोगितामा समिट धरान, रामधुनी, बबियाबिर्ता, विमान ट्रेडर्स बिर्तामोड, इटहरी उपमहानगरपालिका, दमक झापा, मधेशा ट्रेनिङ सुनसरी, आदर्श युवा क्लब लक्ष्मीमार्ग, केराबारी मोरङ, भोक्राहा सुनसरी र आयोजक टिमलगायत गरी १२ वटा टिम सहभागी थिए ।