गोधुँली फूूटबल रनिङ कप : १३ नं. वडाद्वारा ४ नं. पराजित

धरान/ धरानमा भइरहेको २१ औँ गोधुँली फूूटबल रनिङ कपमा सोमबारको खेलमा १३ नं. वडा विजयी भएको छ ।
सोमबार भएको खेलमा १३ नं. वडाले ४ नं. वडालाई ८–० को फराकिलो अन्तरमा पराजित गरेको हो । नकआउटका आधारमा भइरहेको प्रतियोगितामा अब १३ नं. वडाले प्रि–क्वाटर फाइनलमा ५ नं. वडासँग प्रतिस्पर्धा गर्नेछ ।

१३ नं. वडाका लागि परिवर्तन कपाली एक्लैले ४ गोल गरे भने अशोक कटवालले २ गोल र सुशान्त राईले एक गोल गरे । अर्काे गोल भने ४ नं. वडाका शङ्कर नेपालले आत्मघाती गोल गरेका थिए । खेलका म्यान अफ द म्याच १३ नं. वडाका परिवर्तन कपाली घोषित भए । उनलाई १५ सय रुपैयाँ पुरस्कार प्रदान गरिएको थियो ।

प्रतियोगितामा मङ्गलबार पहिलो खेलमा वडा नं. ६ र १६ ले खेल्नेछन् भने दोस्रो खेलमा वडा नं. ८ र १० ले खेल्नेछन् । आगामी चैत ७ गतेसम्म चल्ने प्रतियोगितामा धरान उपमहानगरपालिकाका १९ वटा वडा सहभागी छन् । प्रतियोगिताको विजेतालाई १ लाख र उपविजेतालाई ५० हजार नगद पुरस्कार प्रदान गरिने आयोजकले जनाएको छ ।