बास्केटबल टिमलाई बिदाइ

धरान/ काठमाडौँमा आायोजना हुने २३ वर्षमुनिको बास्केटबल प्रतियोगितामा सहभागी हुन जाने धरानका बास्केटबल खेलाडीहरूलाई बुधबार बिदाइ गरिएको छ ।

धरान–१२ को हिमालयन मेघा कलेजको प्राङ्गणमा धरान बास्केटबल सङ्घ र मेघा कलेजले खेलाडीहरूलाई बिदाइ गरेका हुन् । सङ्घका केन्द्रीय उपाध्यक्ष सुरजकुमार लामा, सुनसरी अध्यक्ष नारायण सुवेदी र मेघा कलेजका बीबीएस कोअर्डिनेटर चन्द्र वनेमले खदा ओढाउँदै टीका लगाएर उनीहरूलाई बिदाइ गरेका हुन् । उनीहरूले जितको शुभकामना पनि दिए । धरानको प्रतिनिधित्व गर्दै ब्रदर्स वास्केटबल टिम प्रतियोगितामा सहभागी हुनेछ ।

काठमाडौँको क्वेस्ट इन्टरनेसनल कलेजको आयोजनामा आगामी फागुन २ गते सुरु हुने प्रतियोगितामा धरानबाट सुजन राईको कप्तानीमा आशिष लिम्बू, कबिन मगर, विशालहाङ राई, मौसम राई, जोमन राई, सर्वधन राई, सुसन श्रेष्ठ, अभिमान राई, सन्तोष राई र सुसन राजवंशीले भाग लिनेछन् । टिमले बिहीवार यहाँबाट प्रस्थान गर्ने कप्तान राईले जनाए ।

बिदाइ कार्यक्रमको क्रममा कलेजले बाटोमा खाजा खान भन्दै टिमलाई ३ हजार रूपैयाँसमेत प्रदान गरेको थियो । कार्यक्रममा हिमालयन मेघा कलेजका एकेडेमिक डाइरेक्टर अर्जुन घिमिरे, फाउन्डर मेम्बर जीवन न्यौपाने, दीपेन्द्र यादव, पत्रकार देवेन्द्र कार्की, कलेजका विद्यार्थीहरूलगायत उपस्थित थिए ।