वायर्नको जितमा लेवान्डोस्कीको दुई गोल

एजेन्सी । रोबर्टो लेवान्डोस्कीको दुई गोलको सहयोगमा जर्मन बुन्डेसलिगा फुटबलमा वायर्न म्युनिखले सहज जित हात पारेको छ । शीर्ष स्थानको वायर्नले शनिबार राति भएको खेलमा फोर्टुना डुसलडोर्फलाई ५–० गोल अन्तरले हराएको हो । घरेलु मैदानमा वायर्नले खेलको १५ औँ मिनेटमा डुसलडोर्फकाले गरेको आत्मघाती गोलबाट अग्रता बनाएको थियो । 

२९ औँ मिनेटमा बेन्जामिन पाभर्डले गोल गर्दा वायर्नले आफ्नो अग्रता दोब्बर पार्यो । ४३ औँ मिनेटमा लेवान्डोस्कीले गोल गर्दै वायर्नलाई ३–० गोलको अग्रता दिलाए । पहिलो हाफमा ३–० को अग्रता बनाएको वायर्नले दोस्रो हाफमा थप दुई गोल गरेको थियो ।  खेलको ५० औँ मिनेटमा लेवान्डोस्कीले व्यक्तिगत दोस्रो गोल गर्दै वायर्नलाई ४–० गोलको अग्रता दिलाए । त्यसको दुई मिनेट पछि नै अल्फान्सो डेभिसले गोल गर्दै बायर्नलाई ५–० को फराकिलो जित दिलाए ।