मिक्लाजुङले पृथकशैलीमा बाँड्यो राहत

 मोरङको मिक्लाजुङ गाउँपालिका अध्यक्ष देवीप्रसाद आचार्यले आफ्नो क्षेत्रमा राहत वितरणलाई पृथक शैलीमा सम्पन्न गरिएको बताउनुभएको छ । पत्रकार भेटघाट कार्यक्रममा बोल्दै उहाँले स्थानीय जनप्रतिनिधि र सर्वपक्षीय समितिबीच समन्वयात्मक भूमिकाबाट राहत वितरण र व्यवस्थापन गरिएको जानकारी दिँदै अति भोकाएका २४ सय ८७ घरपरिवारलाई राहत उपलब्ध गराएको फेहरिस्त पस्कनुभएको छ । सुरक्षाकर्मी, सञ्चारकर्मी, टोल सुधार समितिको रोहबरमा वितरित गरिएको सामाग्री स्थानीय जनप्रतिनिधि र सर्वपक्षीय समितिबाट स्वीकृत भएको छ । पारदर्शी व्यवस्थापनका क्षेत्रमा चुस्त पहिलोपुस्ताका नेता आचार्यले संघीय सांसद, प्रदेश सांसद र स्थानीय सहयोगीहरूले भोका मानिसको भोक मेटाउन गरेको सहयोगको उल्लेख्य चर्चा गर्नुभयो ।
उहाँका अनुसार स्थानीय सरकारले बनाएको राहतकोषमा १५ लाख ६४ हजार ८ सय ८० मध्ये राहत किनमेलमा ९ लाख २४ हजार ८ सय ८० खर्च भएको जनाउनुभएको छ । यसमा १६ हजार २ सय ७० किलो चामल, १६ सय ६६ किलो दाल, ८ सय २३ केजी तेल बाँडिएको छ । लक डाउनका कारण अलपत्र ताप्लेजुङ, नेपालगञ्ज, काठमाण्डौं, कालीकोट, जाजरकोट, खेटाङ, कास्कीलगायतका देशका अधिकांश जिल्लामा रहेका आफ्ना वा त्यहाँका नागरिकलाई समन्वय गरेर लाने र ल्याउने समेत काम गरेको छ ।