_1693980289.gif "#")
धरान/ १३औं संस्करणको नेवा च्यारिटी धरान १० के रनमा केन्याली धावक वील्लियम चेउलीयोट र धाविका शरन जेरोटिचले उपाधि जितेका छन्।
धरान रन समूहको आयोजनामा शनिबार सम्पन्न प्रतियोगितामा खुला पुरुषतर्फ वील्लियमले निर्धारित १० किलोमिटर दुरी ३१ मिनेट ५ सेकेण्डमा पूरा गरे। त्यस्तै, महिलातर्फ शरनले ३८ मिनेट ४२ सेकेण्डमा दूरी पूरा गर्दै प्रथम स्थान हासिल गरिन्।
विजेताहरूले जनही नगद ६० हजार रुपैयाँसहित मेडल प्राप्त गरे। पुरुषतर्फ दोस्रो भएका केन्याली धावक जुलियस मरिउकीले ३१ मिनेट ८ सेकेण्डमा दौड पूरा गरे भने तेस्रो भएका जुम्लाका दुर्गा बहादुर बुढाले ३२ मिनेट ४४ सेकेण्डमा दौड पूरा गरे।
महिलातर्फ दोस्रो बनेकी नेपाल पुलिसकी सुमित्रा कुमारी चौधरीले ३९ मिनेट २८ सेकेण्डमा दूरी पार गरिन् भने तेस्रो भएकी एपीएफकी दिपा परियारले ३९ मिनेट ५९ सेकेण्डमा दौड पूरा गरिन्।
पुरुष र महिलातर्फ दोस्रो तथा तेस्रो हुने प्रतियोगीहरूले क्रमशः ४० हजार र ३० हजार रुपैयाँसहित मेडल प्राप्त गरे।
विजेताहरूलाई शसस्त्र प्रहरी बलका पूर्व आइजीपी दोर्ज कुमार राई, धरान रन समूहका अध्यक्ष रोमु राईलगायतले पुरस्कार प्रदान गरे।
प्रतियोगितामा अन्डर–१२, अन्डर–१६, भेट्रानलगायत विभिन्न उमेर समूहका धावक-धाविकाहरूले सहभागिता जनाएका थिए। धरान रन समूहले च्यारिटी रनबाट उठेको रकम सामाजिक सेवामा खर्च गर्दै आएको छ।
यस वर्षको प्रतियोगितामा स्वदेश तथा विदेशबाट करिब ४ हजारभन्दा बढी धावक-धाविकाहरूले भाग लिएका थिए।
